"İnter"in yarımmüdafiəçisi Asif Məmmədov bizimlə söhbətdə "Qəbələ" komandasına qarşı keçirilən görüş barədə danışdı, gələn həftə baş tutacaq "Neftçi"lə oyun haqqında öz fikirlərini açıqladı və turnir cədvəlindəki vəziyyətdən bəhs etdi. -"Qəbələ"yə qarşı keçirilən qarşılaşma öz gərginliyi ilə seçildi. Matç çox çətin keçsə də, sonradan "İnter" əzmkar qələbə qazana bildi. Baş tutan görüş barədə nə deyə bilərsiniz? -Bu oyun bizim üçün çox önəmli idi. Bu qarşılaşma hər iki tərəf üçün böyük əhəmiyyət daşıyırdı. Məqsədimiz qələbə qazanmaq idi ki, buna da nail ola bildik. Avropakuboklara vəsigə yolunda bu üç xal bizə çox lazım idi. -Bu turda "Qarabağ"ın məğlub olması da "İnter"in işinə yaradı. Belə ki, komandamız Ağdam klubunu keçməklə turnir cədvəlinin 2-ci pilləsinə yüksəldi. - Fikrimcə, birinci pilləni kimin tutacağı artıq məlum məsələdir. Biz də öz növbəsində qalan görüşlərdə qələbə qazanıb 2-ci yeri özümüzdə saxlamağa çalışacağıq. İnşallah, sonda məqsədlərimizə çatacağıq. -Yeri gəlmişkən, çempionat çərçivəsində keçirilən son 5 matçda "İnter" qələbəyə həsrət idi. Amma dünən qələbə əldə etməklə komandamız bu uğursuz seriyanı dayandırmağı bacardı… -Mövsüm boyu hər komanda bu cür vəziyyətlə üzləşir. Belə enişlərin olması qaçılmazdır. Biz də belə hadısəylə üzləşdik, amma zənnimcə, "Qarabağ" klubuna qarşı keçirilən qarşılaşmada biz bu seriyaya artıq son qoya bilmişik. "Qəbələ"ylə oyundakı qələbəmizi isə buna sübut kimi göstərə bilərik. -"İnter"in əsas məqsədlərindən biri Avroliqaya vəsiqə əldə etməkdir. Necə düşünürsünüz. komandamız bu hədəfə çata biləcək gücdədir? -İnşallah biz bunu edə biləcəyik. Bunun üçün isə mövsümün qalan qarşılaşmalarında yaxşı oyun göstərmək və tam gücümüzlə mübarizə aparmaq lazımdır. -Artıq çərşəmbə günü komandamızı Azərbaycan Kubokunun 1/2 final mərhələsi çərçivəsində "Neftçi"ylə çətin səfər qarşılaşması gözləyir. Baş tutacaq bu görüş haqqında nə deyə bilərsiniz? -Bu oyun bizim üçün çox vacibdir. Məqsədimiz kubokun finalına çıxmaqdır, lakin biz bilirik ki, bunu etmək çox çətin olacaq. Komandamızı gərgin mübarizə gözləyir. Mənbə:İnter.az
|